RSS ke ek sangathan shiksha sanskruti utthaan nyaas ne desh bhar ke schoolon mein vaidik ganit shuroo karne ka prastaav kiya. Iske saath hi usane sabhi raajyon mein tribhaasha faurmoole ko prabhaavi roop se laagoo kiye jaane ki maang ki. Deenaanaath batra ke netrutv waali is sanstha ne niyamit ganit ke saath vaidik ganit shuroo karne ki pairavi ki hai, taaki chhaatron mein is vishay ko lekar dakshata ka star behtar ho sake. Is sanstha ke sachiv atul kothaari ne kaha, 'Humne vaidik ganit par ek paathyakram taiyaar kiya hai aur Delhi mein ek school sahit desh bhar ke kuchh niji schoolon se sampark kiya hai taaki ise kakshaaon mein shuroo karavaaya ja sake. ' Unhonne kaha, 'Raashtreeya shiksha neeti ka masauda taiyaar karne ke star par vichaar vimarsh ke dauraan humne chhaatron ke liye vaidik ganit aur usaki praasangikta ko ujagaar karne ka prastaav kiya hai. ' unhonne yeh bhi kaha ki vaidik ganit se savaal hal karne ki kshamata badhti hai aur dakshata ka star badhta hai. Yeh poochhe jaane par ki kya unka iraada desh bhar ke schoolon mein is paathyakram ko laagoo karaane ka hai, unhonne iska sakaaraatmak javaab diya.