Maharashtra ke raajyapaal si vidyaasaagar Rao ne 1993 ke Mumbai visfoton ke doshi yaakoob meman ki daya yaachika ko Budhvaar ko samvidhaan ke anuchhed 161 ke tahat khaarij kar diya aur is tarah uske faansi se bachane ki ummeed khatm ho gayi. Rajbhavan ke ek pravakta dvaara jaari vigyapti ke anusaar, ''Raajyapaal ne samvidhaan ke anuchhed 161 ke tahat yaakoob meman ki daya yaachika ko khaarij kar diya. '' anuchhed 161 kisi kaanoon ke khilaaf kisi aparaadh ke doshi vyakti ki saja ko maaf karne, raahat dene ya kshamaadaan dene ya usaki saja ko nilambit karne, kam karne ya halki saja mein tabdeel karne ke adhikaaron se sambandhit hai. Meman ne 21 July ko uchchatam nyaayaalaya dvaara usaki upachaaraatmak yaachika ko khaarij kiye jaane ke kuchh hi ghante baad yaachika raajyapaal ke samaksh daakhil ki thi. Aaj raajyapaal ka faisala sheersh adaalat dvaara meman ki us yaachika ko khaarij kiye jaane ke tatkaal baad aaya jismein usane kal use di jaane waali faansi ki saja par rok lagaane ki maang ki thi. Is saal April mein ek taada adaalat ne meman ko Nagpur keindreeya jail mein faansi dene ke liye 30 July ki taareekh tay ki thi jahaan vah band hai. Meman ki faansi par rok lagaane ki usaki yaachika par uchchatam nyaayaalaya ki do nyaayaadheeshon ki ek peeth mein mat vibhaajan ke baad faisale ke liye uchchatam nyaayaalaya ne kal teen nyaayaadheeshon ki peeth banaai thi aur sheersh adaalat ki is vruhad peeth ne aaj yaakoob ki yaachika khaarij kar di. Ghatnaakram par pratikriya dete hue mukhyamantri Devendra fadanavees ne kaha ki kaanoon apna kaam karega aur janta ko sanyam baratana chaahiye. Fadanavees ne vidhaan bhavan mein samvaadadaataaon se kaha, ''Kaanoon apna kaam karega. Main sabhi se sanyam baratne ki appeal karta hoon. '' Mumbai (tatkaaleen Mumbai) mein 12 March, 1993 ko saajish ke tahat 12 visfot kiye gaye the jinmein 257 log maare gaye aur 700 se jyaada log ghaayal ho gaye the.